हिमालय टाइम्स
काठमाडौं, पुस २ (टास) । पत्रकार बसन्त महर्जनद्वारा लिखित अनुसन्धानात्मक पुस्तक 'लुम्बिनीः ऐतिहासिक तथा पुरातात्त्विक अध्ययन' को शनिवार विमोचन भएको छ ।
लुम्बिनी र लुम्बिनीसँग सम्बन्धित विविध पक्षहरूको अध्ययन अनुसन्धान गरी तयार पारिएको उक्त पुस्तकको विमोचन लुम्बिनी बौद्ध विश्वविद्यायका उपकुलपति प्रा. डा. तुलसीराम वैद्यद्वारा गरिएको हो ।
सो अवसरमा बोल्दै उपकुलपति वैद्यले विमोचित पुस्तकले बुद्धको जन्म र लुम्बिनीको ऐतिहासिक एवं पुरातात्त्विक पक्षलाई बौद्धिक तवरले प्रस्तुत गर्ने प्रयास गरिएको विचार व्यक्त गर्नु भयो । उहाँले भगवान बुद्ध र लुम्बिनीको महत्वमाथि प्रकाश पार्दै आफूले समय समयमा बुद्ध भारतको लुम्बिनीमा जन्मेका भन्ने पढ्ने गरेको प्रति दुःख व्यक्ति गर्नु भयो । लुम्बिनीका बारे सही इतिहास बाहिर ल्याउनु पर्ने तर्फउहाँले जोड दिनु भयो ।
पुस्तकका लेखक बसन्त महर्जनले लुम्बिनीका बारे एकमुष्ट जानकारी दिने उद्देश्यले पुस्तक लेखेको बताउँदै लुम्विनीप्रतिको सानै देखिको आफ्नो अनुरागका कारण पनि पुस्तक तयार हुन सकेको विचार राख्नु भयो ।
कार्यक्रममा नेपाली इतिहास, संस्कृति तथा पुरातत्व केन्द्रिय विभाग, त्रिभुवन विश्वविद्यालयका प्रमुख प्रा. डा. मुकुन्दराज अर्याल, नेपाल तथा एशियाली अनुसन्धान केन्द्र, त्रिविका कार्यकारी निर्देशक प्रा. निर्मलमान तुलाधर, पुरातत्त्वविद् शुक्रसागर श्रेष्ठलगायतका व्यक्तिहरूले विमोचित पुस्तक र लेखकका बारेमा आ-आफ्नो विचार राख्नु भएको थियो ।
(हिमालय टाइम्स, पुस ३, २०६२)
